MÄR
一早起身，百無聊賴，想找著就把魔兵傳奇最後一集看完吧，於是，便成了二一年第一部補完嘅動畫。
猶記得第一次睇魔兵傳奇，約莫是小學五年級。嗰陣星空臺首播，守喺電視機前準時收看，睇完之後，都覺得幾好睇。第二日翻學校同同學講起，討論甚是熱烈。自此，每晚都準時菢喺電視機前，一集都唔错過，即使有日去咗同學屋企玩，亦要夠鐘就開定電視睇，真係忠實番薯 1 嚟噶。每當劇中出現重要嘅專有名詞，就會用張紙記低，（都幾似小學生會做嘅嘢。。。）因此到依家劇中嘅名都依然朗朗上口。課餘時間，仲同同學自研手勢游戲，咩十三圖騰柱、小雪人啊，都係極之開心。後來，星空臺好似播到打完魅影之後，就冇繼續播了。（星空臺就呢樣唔好，虎頭蛇尾，記得海賊王又係播完恐怖三桅帆船就冇了，搞到要走去補漫畫。。。。。。）
後來，大概十年後，無意中喺乙站 2揾到全套劇集，當年嘅回憶瞬間飆晒出嚟，梗係第一時間儲起佢啦。之後係陸陸續續噉補。大二暑假得閑，就從魅影篇開始，一集集看。揾到嘅係國語版，不過冇字幕，就好似做聽力噉，總有一兩個字聽唔清。不過國語配音好有當年嘅感覺，雖然當年有字幕，但呢部係爲數不多 嘅我願意睇配音版而唔係原版嘅動畫，可能係習慣咗。
大三開學，各種事務變得繁忙，於是便斷了補完。日日忙到死，終於挨到趕完截
3考完試，轉眼就來到年底，
很快，一集一集地過，轉眼就看到最後一集。（雖然途中刀咗好多人，不過按熱血動畫嘅套路，最後肯定會翻生嘅。（不過。。。。此處點名藤本樹 4，我的精神病人。）不過安西信行5最尾好似癲咗噉搏命刀人，感覺有啲無謂。）同樣地，時間也來到二〇年最後一日。站在年末，回望這一年，確實是不盡如人意的一年。選擇了活在當下的我，也不作多想，轉頭便投入夢鄉。翌日，依依不捨地打開最後一集，好似十年來的回憶都即將畫下句號般。最後一集，其實并非第一次看了，早在六年級還是初中，我就到土豆搜了最後一集來看，但當時跳過了很大一部分，最後也看了個茫茫然，唔知點解最尾主角穿越翻現實世界。後來，同人討論個陣，仲被人話係咪年代太耐記懵咗。其實年代係一個原因，另外直接跳最尾一集都有關係。（話説我當年睇嘢，無論係動畫定漫畫，鍾意睇第一集同埋最尾一集，就當睇完。。。可能當年冇咁多零用錢，至作出嘅最經濟決定。）因此，現在看最後一集，當年看最尾一集嘅殘存回憶也陸續浮現在腦海中，一切的劇情都拼接成一條完整的珠鏈，這種時空交錯的憶記，真係好難得。最尾，主角回到了自己的世界，異世界也恢復了和平，大團圓結局。不過，桃樂絲，我當年最喜歡的角色，經歷過重重挫折，只能遺憾地對主角道出心聲，卻孤單地留在異世界，都係覺得好可惜。當年會覺得這樣的結局並不好，但現在再回頭細看，最刻骨銘心的永不會是大團圓的完美結局，而是悲劇的力量才更令人惋惜銘記。終究，他們不是同一個世界的人。結局，縱有遺憾，亦是注定的合乎情理。
後記
好耐冇寫過日記，上一篇都好似係初中嗰陣了。雖然當年橋橋 6十分熱鬧，但如今相比之下也冷清不少，畢竟橋橋已是上個年代的產物。至於爲什麽要以日記的形式發表，我想，如果當年的我，大概會以這樣的形式將它記錄下來。